السلام عليكم ورحمة الله وبركاته،،،
قصيدة عندما افتقد الشاعر مطلق الحريجي طيرة بالمقناص وهذة القصيدة فازت بجائزة افضل قصيدة بفقدان الطير
القلب يزهمني وانا اقول لبيه
ماجور ياعز الضلوع الحناوي
مثلك الا غابت لياليه تبكيه
روس الرجال مبعدين الهقاوي
الله يعوضك بالصبر يوم ترجيه
طير غدى قبل امس وامرح خلاوي
النادر اللي ضاع وابعد حراويه
وانا عقب فرقاه مانيب قاوي
لصار لك غالي تحبه وتفديه
عزاه يافرقا العديم النداوي
اشقر وبه شي على شانه اغليه
ولف وكنه يفتهم للعزاوي
اليا سمع صوتي ولوبرقعه فيه
تلقاه يلفح بالجناح الرهاوي
ماهوب جوع ذاك غيري يخليه
عندي مثل خطوى الصغير الرضاوي
ا شقر حمر ريشه كما النير وجنيه
واطرافها تمر الخلاص الحساوي
وعين لكنه يسرق اللي يراعيه
وشد على روس الجناح متساوي
غدا وانا متحسف كيف انا اغديه
ولاني مصدق ضيعته والدعاوي
لاعاد يوم جيت في وادي التيه
يوم غدا لي من كبار البلاوي
جيناه من شرق وقلنا نعديه
عن الوعر دام النهار متضاوي
ومن القراده تل طيري وانا اعطيه
على خريش ناحرت بيت شاوي
مستوطن بين الوعر والمتاييه
عسر ومنزاله عن الناس لاوي
غرب مع بطن الشعيب ومفاليه
والقاع ســيل والمــواتر تـراوي
واقفى يلم ويرتفع في مواميه
مخرم وخابرا للمعــشا حراوي
عدوة عديم معتدي من معاديه
وذبت وطاويها من الموت طاوي
واطيارها عسر على اهل المشاريه
من شفـتها قمت اعتـزي بالنخاوي
كنك تسوق بها الرصاص المعبيه -
كدرية تــسـقي فروخ القطــاوي
قمت ازهم السواق وانخي واسميه
من كثر ماانخى صار مثل العماوي
غدا وعرضنا الشعيب وملاويه
- مابين جرف والحصى والمهاوي
اتلى-العهد به مرتفع قبل لاخفيه
بين الطوال المشرفات العلاوي
وحولت واشوح الملاويح وادعيه
واصيح وادعي كني الذيب عاوي
وقمت التفت غرب الشعيب وشماليه
وانا على الرجم الطويل الصداوي
ابطى وانا ارجي شوفته قبل اعشيه
والشمس غابت واسود الليل داوي
وحولت من رجمي وانا بس احاتيه
وقامت تصفقني عليه الطراوي
وامسيت اعزي وتعزز وعزيه
عندي وصارت شوفته بالمناوي
ومن الفجر باكر جهمنا لواديه
على مهده ضابطين الخطاوي
وكلن يلوح بالطمان وعلاويه
والطير ضاع ولاتفيد الرجاوي
وشرهت يومني خوي مخاويه
واثره على ماقال فيه العطاوي
غدا وانا متحسف كيف انا غديه
ولاني مصدق ضيعته والدعاوي
شاعرها مطلق الحريجي
ولكم منى أطيب تحيه وتقدير،،،
