الصيد بالطيور والصقاره من اشهر الهوايات الي ابدع الشعار في وصفها والابداع في ذكر اوصاف الطيور وافعالها ووصف الهدد والمقناص وتصوير كل ما يتعلق بالصقور من جمال المنظر والقطوع وصفات كالشجاعه والسرعه والطلع وغيرها من المميزات .
ومن المعروف ان كثير من الشعار ابدعوا في هذا المجال وفيه ابيات مشهوره كثير ما نسمعها من محبين الصقاره ويرددونها وحبيت يكون فيه موضوع مستقل يجمع افضل ما قيل من ابيات تميزت بالابداع في وصف الطير والهدد وحب الهوايه بكل مافيها من تعب وتدريب وهدر الوقت والمال في سبيل هذا العشق وهوالاشهربين الهوايات في تعلق محبيها وارتباطهم بها.
وهذي أبيات مختاره للشاعر والصقار المعروف : بدر الحويفي الحربي :
قال مدافعا عن هوايته وذكر ما يبرر حبه وتعلقه بها
والله يلولا غايتي ما انقل الطير ..................ما انقل على كفي خفوق الجناحي
ابي اليا قفت تقل شعف معصير........................ واقفت تعقـد مع سهــال فيـاح
لا تلني واقفى يخطرف له السير ................... جايع وحاديه الزعل من صياحي
لاطقها بالصايديـن المــواخــير .................... طاحت تدوس ونجم الطير صاحي
الى قوله مخاطبا من يلومونه بحبه للصقاره وخسارة الوقت والمال لاجل هوايته
وما ينقص الرجال كثر المخاسير .............لاصار دون الوجه ما هو سفاحي
والقل ما عذرب رجال بهـم خيـر ............ والمال ماعـز الرجـال الشحاحـي
بس اتركوني يالوجيه المسافيـر ................هـذا الـي وافـق علـيه اقتراحـي
وقوله
يالي طلبتوا نبذتن من قصيدي ................عن واقع المعقول لاانقص ولاازيد
انا غرامي وانبساطي وعيدي.................. تفريعة القرناس بارضن بها صيد
وكذلك ابدع في وصف الهدد وتصوير جمال الطير
ومعـنا قطـامـي يصـيد الحبــاري..................... لحـاق لكوبــر له الخـرب شلـه
خطو اشقر جـثل من الريـش عاري .................افحــج مخاليــبه سوات الاهــلـه
بــه دق ريش مــثل دق الخــزاري................... مهــدف ورا منــاكـبـه مسـتقـلـه
منخر وبـوز فيـه عـدت مواري..................... يحـتار به راع النـظـر لافطـتـن له
مـاهــو بكـفاخ طـفــوق زعـاري....................... طلـعه حقـاق لاشافهـن ساوقـن له
لا شـافهـن مــتطـاولات المـذاري .....................عــقـد وحـق الطــلـع والسـير تلـه
ويحـــول الـي طـار منهـن اجبـاري...................... ذبـاح الـي يـوم هــد سجـدن لـه
يازيــن طلعه بالضحى والعصاري .......................لمـن خـشنات الغـلب خيشــن لـه
وقولــه:
ومعنا اشقر جثل المناكب غلاضي .............. افـحج مسـرول والمـناخر وسـيعه
والـبوز وافـي والثنـادي عراضـي ............... حرش كفـوفه مـثـل شــوك النقيــعه
صـيروم ضـربه بالهداد انقضاضي................. مضـرب كفـوفه بالحـباري شنــيعه
طـلعه عليـهـن فزتـن بانتهاضـي .................... يردم وله كسره عليـهن سريــعـه
وقوله ايضا في وصف الهدد
اليا اصبحت روس النوازي مطـله................ عقب الجليد نكسر الــثلـج تكسـير
ثـم اصبح الـقـرناس مـن عقب طله............... يوجس براسه مــثل دق المسامــير
وستطلعوا خـطوا اشـقر عاتـن لـه................حرش الكفـوف يمزر الـخرب تـمزير
والبارحـه حـل المساء قـد حـصله ................عشاء خفيف من ابرق الريش تنسير
لا فـرعوه وشافـهـن ودرجـن لــه .................. وادلج وراع الجمس كفه على القير
وتضايقن عقب الفضا وحضرن له ................وسلـط عـلى وحــده وذلـك مخاميــر
واليا المشبب عنـدهن مزهـب لـه ................. بـالـي ندبـها طــير الـريــش تطـــيير
والخــرب طقــه مـا تـعــدى مـحلــه ................. والـي تروح طـيار ما عـينت خــير
بطــيارها شـفـنا غيـاره وخـلـه ...................... زمـت وحــولـهـا ولـي الـمـقـاديــر
اعلق بها الي عوقهن سهمة له...................... شيهان عوق ملوعات المعاشـير
وقال مخاطب طيره عقب ضياعه
ياطـير يالي لابــرق الريـش جــذاب................ بالقـاع وان طـارت يخــيب تعـبهـا
لاشافهن في جانب الروض ماهاب ...............حول على الي نفـضت لــه غـلبـها
بـالـيـد مـا يكفــخ ولـلصــيـد قـصــاب ............... كـم خـارمن منه اقرشت لا ضربها
غدى وانا اومي له على راس مرقـاب............ طــلعـه ورى برقـى بعـــيد طـلبــــها
وهذي ابيات من ابداعات الحويفي
مالي هدف بالسوق بايع وشاري................. قـلبي ذعاذيـع الهـوى ولعـتن لـه
انا غـرامي مع فجــوج الصـحاري............... وشــوف الرجـوم النايفـات المطـله
لاشفت بالريضان نقع وخبـاري ................راح الـزعـل والبـسط حــل بـمـحلــه
..
ومن ابداعاته قوله
انا غرامي شقت النور مجهـام ......................الفجر لاقفى الليل نوره يسـوقه
لاطـاب نـوم الـي اليا نـام ماقام .....................اكـبر ضحى ياكـل غـداه وريوقه
.
ابيات من قصائد للشاعر الكبيرعبدالله بن نايف عون.
قصيده في ( عباث )وهو طير للامير نايف بن عبد العزيز
بمناسبة صيد 18 حبارى باليوم
ياهل الطيور الي تصـيد الثلاثـي .................... تحطيمـكم لاكـبر عـدد مثـل الاظغـاث
لـو تجمعون ذكـورهن والاناثـي .................... اكـبـر عـدد مــا حطمـه غـيـر عبـاث
النـادر الـي بالـهـدد مـــا يثاثــي .....................لا فـرعــه راعـيه مــا هـوب لثــاث
عباث في زرق الغلب يــوم عاثي..................كنـه عديمن لــه علـى الهوش حثاث
وهذه الابيات لابونايف في مدح ( بطاش ) وهو من طيور الامير نايف ايضا بعد ما صاد
21حبارى باليوم :
ارقام اهل الصيد ما هيب تنهاش ...................... لطيور نايف سجلت بيـن قوسين
عباث هد وصاد من برق الارواش ....................عشر وثمان وزود حواش ثنتين
وما نافسه في مركزه غير بطاش.................. من كف نايف صاد واحد وعشرين
هده ضحى ومفرعه كنه الشاش .....................وامسى وهو متشارك فيه لونين
على كفوفه رايب الدم غطاش ....................... كنه خضاب في كفوف المزاييـن
وهذي ابيات لابونايف يصف فيها معناته مع الطير
الله يلوم الطير ما اقـشر طـبوعه .................... انشهد ان خيـر اسامـيه مقلــوع
لـو كان تمشي لـه برسم المطوعه.................... بـالجـو يبنـي لـه ثمانيـن مشروع
لا بـد مــا يفجـع خـويه بلوعــه .....................ويغيـر الموضوع الاول بموضـوع
هذا وانا امشي له برسم المطوعه ...................مثـل الحشيم الـي له الامر مطيوع
[size=18]ومن ابداعات الشاعر الكبير عبدالله بن عون في وصف الهدد:
ويطرب لنقل مسخر الخرب تسخير .............. واطلاقة المسباق شــفه وكـاره
وينومسه فعـل الفـروخ المغـاتيـر................. ومن كـل قرناسـن تخيــر خيـاره
هذا يخلي الريش مثل المعاصير .................. وهـذا يـشوقه لاحـدر في طـيـاره
ونختم هذه الموضوع بهذه الابيات في رثاء الطير لابوسلمان :
يـابـوفهـد قلبـي تقـل فـيه لحـام....................... كنه براس التاج تكـوى عـروقـه
اسباب طير مات والناس صيام...................... باخـر شهر تسعه طـوينا سبوقــه
النـادر الـي يعجب العيــن لاحـام..................... يازين تنجيمه وما احلى خفوقـه
صيروم لاحول على الخـرب جزام .................وان طـار واقفـى عن نـويه يـعوقه
ان شاء الله اكون وفقت لتقديم ما يرضي الجميع[/size]
تقبلو تحياتي
