#المكتوب من الله يجيك#

بسم الله الرحمن الرحيم

السلام عليكم ورحمة الله وبركاته

هذي قصة لواحد من الزملاء الله يصبحه بالخير ومن يشاهد الموضوع يقول اخذت اجازة لمدة خمسة عشر يوم لمقناص شبك الصقور وكان في خاطري ديره تبعد من البيت حوالي 250 كيلو والاجازة تبداء الاحد والوقت ضيق ودنا نأخذ الاجازة من اولها المهم مشينا الاحد وعيني على ها الديره ولا امسينا الا فيها كان معي ولد عمي الله يصبحه بالخير الآن متواجد على الحدود الجنوبيه الله ينصرهم المهم كان فيه واحد عزيز علي في هذي الديره وقلت لازم اسلم عليه ناديته في الجهاز وجاوبني على طول وقابلني عصير قبل المغرب وسلمت عليه وعزمنا ولزم فينا ولكن اعتذرنا المهم قال عندي علم مهم جدا قلت ان شاءلله خير قال فيه طير حر له ثلاثة ينزل من الجبال ويتصفق في ها القيزان واغلب قنانيص المنطقه متواجدين وابيكم ترزقون الله عسا الله يطرحه بين ايدكم المهم مزحت معه قلت ماني اطيب من الصقاقير المتواجدين قال هذا رزق يسوقه الله على من يشاء المهم دورنا ممسا ولقينا قوز كبير بالحيل وسوينا قهوتنا وعشانا واخذنا في الكلام مع خوي قلت ان شاءلله نمهده بكره قال انشاءلله امسينا وقبل الفجر صحينا وتقهوينا ولبسنا زريقنا قطا وقماري وحمام وسماني المهم حنا في حروة الطير المذكور صلينا الفجروتقدمنا حوالي 200 متر من مكان ممسانا المهم حصلنا العقب ممسيه وقمت ادربل عليها للتأكد في هذه اللحظة قطع على طير عجل المهم قلت لخوي فيه طير قطع علي وانا ادربل ولاهو مبعد تقدمنا حوالي 50متر ودربلت امسح الارض الا والطير موقع في مطوى القوز واقطع عليه الا هو حر قلت لخوي ابشر بالطير ولكن لازم نسبره ولا يضيع منا لانه عاصي على كلام الرجال ماكملت كلامي الا هو يطير يتصفق بالقيزان المهم خذينا معه اللين وقع مره اخرى هديت له سمانى مثقله ولا بغاها هديت قطاه طلق مابغاها المهم قلت لخوي الطير مايبي شي من الزريق المحذوف من السيارة المهم استدرجنا من ورا قوز كبير مرتفع نشوفه ولايشوفنا هدينا حمامه طلق مشبكه المهم ماهد اللين تأكد انه لايوجد سيارة وهد عليها وبعد ماطرحها قبلت عليه من بعيد واخذها وضفها وقام يتصفق بالقيزان المهم الطير مانبي نبعد منه وفي نفس الوقت مانبيه يحذفها المهم تجمعوا الصقاقير والطير موقع وعينه على السيارات المهم قلنا للقنوص وقفوا الطير مايبي حركة زائدة المهم تقدم معنا واحد ودرنا الطير وحذف الحمامة ماعلق وقع جلس حوالي الساعه حذفنا جميع الزريق حتى الحجل والكراوين والنقل مانطول عليكم سخن الجو والطير بداء يناظر فوق والصقاقير يقولون الله يعوض عليك اطيب منه وطار الطير يبي الجبال وسبحان الله طار قمرية من الزريق من بعيد وهو يعود عليها ويأخذها ناوي بالجبال وينزل عليه ذاك العقاب وينزل الطير بالقوة وقع الطير المهم العقاب عطيناه سمانا وقلت لازم نهد عليه الطرادات الطير نشيط وكبير ولايقبل السيارات وعلى الله الطير موقع وحركته زادت المهم هدينا طرادين سواء على اساس تخلفه وهو يقوم ويعلق بالجو واحد من الطرادات وقع المهم فكوا القناصه طراداتهم وانا مع الطير لايضيع المهم الطير نجم والطرادات مهب حوله مانطول عليكم سبحان الله لاكتب الرزق يجي ارسل عليه الله عقاب ثاني في الحوم وهو يلطمه يبي الزريق الي معه الا والطير معلق شوي الا معه واحد من الطرادات ينزله والعقاب حذفنا له من الزريق اللين اخذ منه وكانت فرحه ذاك اليوم ماتنسى الطير مقاساتها 17.5*17 تم بيعه فوق 200 الف هذه قصة مختصرة لزميل عزيز على قلبي يستحق اكثر من نشر هذا الموضوع المميز الله يرزقه ويرزق جميع القنوص ويستر عليه من كل مكروه شاكر ومقدر